உலக டென்னிஸ் அரை இறுதியில் ஷரபோவா

வீராங்கனைகள் மட்டுமே பங்கேற்றுள்ள உலக பெண்கள் டென்னிஸ் சாம்பியன்ஷிப் போட்டி சிங்கப்பூரில் நடந்து வருகிறது. இதில் ‘ரெட்’ பிரிவில் கடைசி லீக் ஆட்டங்கள் நேற்று நடந்தன. ஒரு ஆட்டத்தில் அக்னீஸ்கா ராட்வன்ஸ்கா (போலந்து), தரவரிசையில் 2-ம் நிலை வகிக்கும் சிமோனா ஹாலேப்புக்கு (ருமேனியா) 7-6 (5), 6-1 என்ற செட் கணக்கில் அதிர்ச்சி அளித்தார்.

ராட்வன்ஸ்காவுக்கு இது 500-வது வெற்றியாகும். மற்றொரு ஆட்டத்தில் ரஷியாவின் மரிய ஷரபோவா 7-5, 6-1 என்ற நேர் செட் கணக்கில் அமெரிக்க ஓபன் சாம்பியனான இத்தாலியின் பிளவியா பென்னட்டாவை தோற்கடித்தார். ‘ரெட்’ பிரிவில் ஷரபோவா 3 வெற்றிகளுடன் கம்பீரமாக அரைஇறுதிக்குள் நுழைந்தார்.

ஹாலேப், ராட்வன்ஸ்கா, பென்னட்டா தலா ஒரு வெற்றி, 2 தோல்விகளுடன் சமநிலையில் இருந்தனர். செட் அடிப்படையில் ராட்வன்ஸ்கா அரைஇறுதிக்கு தகுதி பெற்றார். ஹாலேப், பென்னட்டா வெளியேற்றப்பட்டனர். 33 வயதான பென்னட்டா ஏற்கனவே அறிவித்தப்படி சர்வதேச டென்னிசில் இருந்தும் விடைபெற்றார்.