நடிகர் ஷாருக் கான் திரைப்படமொன்றில் குள்ளமான பாத்திரத்தில் நடிக்கவுள்ளார். ஆனந்த் எல் ராய் இப் படத்தை இயக்கவுள்ளார்.
தானு வெட்ஸ் மானு, தானு வெட்ஸ் மானு ரிட்டர்ன்ஸ், ராஞ்சனாஹ் திரைப்படங்களை இயக்கியவர் ஆனந்த எல் ராய். தனது அடுத்த படத்தில் ஷாருக் கானுடன் இணைந்து அவர் பணியாற்றவுள்ளார்.
இது குறித்து ஆனந்த் எல் ராய் கூறுகையில், “ஷாருக் கான் மிகச் சிறந்த மனிதர். பெரிய இதயத்தையும் கொண்ட புத்திசாலித்தனமான மனிதர் அவர்.
இப் படத்தில் குள்ளர் பாத்திரத்தில் ஷாருக் கான் நடிக்கவுள்ளார். தற்போது நாம் திரைக்கதை தயாரிக்கும் கட்டத்தில் உள்ளோம்” எனத் தெரிவித்தார்.
இப் படத்தின் கதையம்சம் குறித்து கேட்டபோது. “என்னைப் பொறுத்தவரை, 3 அடி ஒரு அங்குலம் மாத்திரம் உயரமான ஒரு நபரைப் பற்றிய கதை இது” என இயக்குநர் ஆனந்த் கூறினார்.
இப் பாத்திரத்தில் நடிப்பதற்கு தன்னம்பிக்கையுள்ள ஒருவர் தேவை என்பதால் இதில் ஷாருக் கான் நடிக்க வேண்டும் என தான் விரும்புவதாகவும் அவர் கூறினார்.
50 வயதான ஷாருக் கான் நடித்த ஃபேன் திரைப்படம் கடந்த 15 ஆம் திகதி வெளியாகியது. ஷாருக் கான் இரட்டை வேடங்களில் நடித்த இப் படம் வசூலில் எதிர்பார்த்த அளவு வெற்றி பெறவில்லை.
அவர் இறுதியாக நடித்த பல திரைப்படங்கள் 100 கோடி இந்திய ரூபா வசூலைக் கடந்தன. ஆனால், ஃபேன் திரைப்படம் அந்த இலக்கை அடைவதற்குத் தடுமாறுகிறது. தற்போது ராயீஸ் திரைப்படத்தில் ஷாருக் கான் நடித்து வருகின்றமை குறிப்பிடத்தக்கது.
