ஜப்பானை சேர்ந்த அகிஹிகோ கொண்டோ (35) என்ற நபர் ஒருவர் கற்பனை கதாபாத்திரமான பெண்ணின் பொம்மையை விசித்திரமாக திருமணம் செய்து கொண்டுள்ளார்.
சில வருடங்களுக்கு முன்னர் கொண்டே ஒரு நிறுவனத்தில் வேலை செய்தார். அங்கிருந்த பெண் உயர் அதிகாரிகள் குறித்த நபருடன், அடாவடிதனமாக நடந்து கொண்டதால், அவரின் வேலை பறிபோனது. இதிலிருந்தே பெண்கள் மீது அவருக்கு கோபம் இருந்தது.
இதையடுத்து ஹட்சுன் மிகு என்ற கற்பனை கதாபாத்திர பாடகியின் பொம்மை உருவத்தை திருமணம் செய்து கொள்ள முடிவெடுத்தார். அதன்படி கடந்த ஞாயிற்றுக்கிழமை உறவினர்கள் மற்றும் நண்பர்கள் முன்னிலையில் அப்பெண் பொம்மையை திருமணம் செய்து கொண்டார்.
ஒரு ஆண் – பெண் திருமண நிகழ்வில் இருக்கும் கேக்’குகள், பரிசு பொருட்கள், மோதிரம் போன்ற அனைத்து விடயங்களும் இத்திருமணத்திலும் இடம் பெற்றன.
மணமகன் முழு வெள்ளை நிற ஆடையிலும், பொம்மைக்கும் வெள்ளை நிற ஆடை அணிவிக்கப்பட்டும் திருமணம் நடைபெற்றது.
குறித்த பாடகியின் சாயலில் பொம்மையை தெரிவு செய்தமைக்கான காரணமாக கொண்டே கூறுகையில், நான் கவலையாக இருக்கும் போது ஹட்சுன் மிகுவின் பாடல்களை தான் கேட்பதாகவும், அது தனக்கு மனதுக்கு ஆறுதலாக இருப்பதாகவும், அதனால் தான் அதையே திருமணம் செய்ததாக கூறியுள்ளார்.
