‘ட்ரிப்’ விரைவில்

‘ட்ரிப்’ விரைவில்

(ஃபாஸ்ட் நியூஸ் | இந்தியா) – நகைச்சுவை மற்றும் திகில் படமான ‘ட்ரிப்’ வருகிற எந்த திகதியில் திரைக்கு வரும் என்று படக்குழு அறிவித்துள்ளது.

இயக்குனர் டென்னிஸ் மஞ்சுநாத் இயக்கத்தில் யோகி பாபு, கருணாகரன், சுனைனா நடிக்கும் படம் ‘ட்ரிப்’. இத்திரைப்படத்தை எ. விஸ்வநாதன் தயாரிக்க சித்து குமார் இசையமைத்துள்ளார். நகைச்சுவை திகில் படமாக உருவாகியுள்ள இப்படத்தினை ஒளிப்பதிவாளர் உதய ஷங்கர் மற்றும் படத்தொகுப்பாளர் தீபக் எஸ் ஸ்வாரக்நாத் இணைந்து உருவாக்கியுள்ளனர். ‘ட்ரிப்’ படம் குறித்து இயக்குனர் கூறுகையில், ஒரு பயணத்தின் போது ஏற்படும் எதிர்பாராத குழப்பமான சம்பவங்களை காமெடி கலந்து சொல்வதாக இருக்கும்.

யோகி பாபுவும், கருணாகரனும் பெயிண்ட் அடிக்கும் வேலைக்காக ஒரு பயணம் மேற்கொள்ள, இடையில் குறுக்கிடும் 5 பசங்களும் 4 பெண்களும் இணைந்த ஒரு டூரிஸ்ட் செல்லும் கும்பல் என இவர்களுக்கும், ஒரு காட்டுக்குள் நடக்கும் சம்பவங்களை மையமாக கொண்டதே இப்படத்தின் கதை. தமிழுக்கு புதிதான ஒரு படமாக சயின்ஸ்பிக்‌ஷன் டார்க் காமெடி கலந்து அனைவரையும் கவரும் வகையில் இப்படம் இருக்கும் என்றார் இயக்குனர் டென்னிஸ் மஞ்சுநாத். இந்தப் படத்தில் நடிகை சுனைனா நடித்துள்ளார். 2008 ஆம் ஆண்டு சுனைனா நகுலுடன் இணைந்து ‘காதலில் விழுந்தேன்’ என்ற தமிழ் திரைப்படத்தின் மூலம் அறிமுகமானார்.

இப்படம் அவரின் சினிமா வாழ்வில் முக்கியமானதாக இருக்கும் என்கிற நம்பிக்கை எனக்கு வலுவாக இருக்கிறது என்று அவர் கூறியிருந்தார். இப்படத்தில் முதலில் என்னைக் கவர்ந்தது படத்தின் திரைக்கதை என்றும், அதை இயக்குநர் டென்னிஸ் சொல்லிய விதம் படத்திற்குள் பயணம் செய்தது போலவே இருந்தது என்றும் நடிகை சுனைனா கூறியிருக்கிறார். மேலும், இப்படத்தில் என் கதாபாத்திரத்தின் முக்கியத்துவத்தையும் மற்ற கதாபத்திரங்களை பற்றியும் தெரிந்து கொண்டேன். கதையின் பயணம் மிகவும் அற்புதமானதாக இருந்தது என்றும் தெரிவித்துள்ளார்.

படத்தில் அறிமுக நாயகனுடன் நடிப்பதைப் பற்றி சுனைனா பேசுகையில், அனுபவம் வாய்ந்த நடிகர் புதிய நடிகர் என்பதெல்லாம் சினிமாவில் முக்கியமில்லை. அவர்களுக்கு கொடுக்கப்பட்ட கதாபாத்திரத்தை அவர்கள் எவ்வாறு கையாள்கிறார்கள் என்பதும் அதை அவர்கள் வெளிப்படுத்தும் விதமும் தான் முக்கியம். படத்திற்காக நடந்த ரிகர்சலில் பிரவீன் தன் தனித்தன்மை வாய்ந்த சிறந்த நடிப்பை தந்தார். அவர் இப்படத்திற்கு மிகச் சிறந்த தேர்வாக தன்னை நிரூபிப்பார் என்று அவர் கூறியிருந்தார் என்பது குறிப்பிடத்தக்கது. மேலும் இப்படத்தில், யோகி பாபு நடித்துள்ளார். தமிழ் சினிமாவில் ஒரு நகைச்சுவை நடிகராக தொடர்ந்து நடித்து வந்துள்ள இவர், தர்மபிரபு’, ‘கூர்கா’ படங்களில் ஹீரோவாகவும் நடித்துள்ளார்.